7 مراحل الحب - هيبتا

كنت بقرأ في رواية هيبتا

هى بتتكلم من وجهة نظر الكاتب عن ان الحب 7 مراحل و ان فى 7 احاسيس ممكن يقضوا على الحب ده فى مهده اذا مفهمناهمش و لا اتعاملنا معاهم صح.

و هيبتا هو رقم 7 بالاغريقية - السبع مراحل حب

المراحل : 1- البداية - 2- اللقاء - 3- مرحلة العلاقة - 4- الإدراك - 5- الحقيقة

الاحاسيس السبعة : الامتلاك - عدم التقدير - اللإحتياج - الحِمل - الغيرة و الشك - التطبيع - الملل

1- البداية :

حد عايش حاسس إن فى حاجه ناقصاه

2 - اللقاء :

ليتهم يعلمون

أنهم لم يخلقوا من الاصل الا كي يُحبوا ..

عبادتهم حُب, ايمانهم حُب .. تحملهم لكل ما في الدنيا من تخبط عشوائي حب ..

المرحلة الى كل واحد بيكتشف انه لقى نصه الثانى .. مجرد بتقابله و بتحس انك لقيت الى كان ناقصك ...

كل حاجة متتصدقش .. كل حاجة بسرعة أوى .. اللحظه الي بتلاقي فيها تعريف بسيط لنفسك .. إحساس إنك ناقص حتة .

" أي حد قالك انه خد وقت عشان يحس بالحب كدب عليك .. لأن دائما منغير استثناءات .. اللي بيحب بجد .. أول ما بيشوف حبيبه بيحس بحاجة ..مهما كانت صغيرة ..مهما كانت ولا حاجة .. بيحس ان اللي قدامه ده هيبقي حاجه مختلفه ."

يعنى الجنان و اللهفه الى فى الأول دي طبيعى فى حالة الحب ... الى كان كل واحد مستنى التانى ... مش بداية عادية كده و خلاص زى ما أحنا .

عشان كده بيبان قوي .. الفرق بين الحب اللي بجد .. و اللي حب الاهتمام بس ,, تلات اربع الجوازات بيبقي عشان بيحبوا الاهتمام .. بيعوض نقص جواهم او بيخليهم يعيشوا في موود الحب ... بس اللي هما مش عارفينه ان الحب مش تعويض نقص ... الحب اكتمال روح

فيه قصص حب كانت ممكن تبقي عظيمة جدا لو مانتهتش عند المحاولة ... بس لو فكرنا شويه

3- مرحلة العلاقة

مرحلة بداية العلاقة عادة ما بتبقاش محتاجة كلام كتير .. الناس مبسوطة ..كل واحد بدأ يلاقى تعريفه شوية, و يكشتف الشخص اللى معاه واحدة واحدة ... الموجة بتاعت الحب العاصف اللى فى الأول بتهدى شوية ... كل واحد أستهلك طاقة و مشاعر معينة عشان يوصل للى بيحبه ..و كل اللى بيبقى محتاجه بعد ما بيوصل ...إنه يريح شوية ..

السعادة اللحظية و بداية ظهور شخصية اللى قدامنا .. استطعامنا لكا حاجة بتتقال و بتحصل فى الشخص اللى معانا ..الانبهار بتاع " إيه ده..أنا مرتبط و معايا حد بيحبنى " ...إنك اخيرا لقيت اللى يترجمك ..

مرحلة العلاقة, رغم انها قصيرة و ما فيهاش كلام كتير , لكن هى واحدة من اهم المراحل .. لأنها الهدف لأى اتنين بيحبوا بعض .. هى النهايه بالنسبة لناس كتير .. اللى ماحدش فيهم بيفكر " ايه الى هيحصل بعد كده" و بتبقى صدمة لمعظم الناس . احنا دلوقتى وصلنا لقمة الجبل ...لأقمة منحنى .. و زى ما كلنا عارفين القاعدة الثابته ... إيه الى بييجى بعد القمة ؟

القاع

4- المرحلة الرابعة الادراك:

قيل فيما مضي إن الحب عادة ما يصاحبه الألم ..

لم يعرفوا أن البشر هم الجناة .!

كل واحد فينا مابينساش أول مرة شاف نصه التاني .. ما بينساش الحاجات المجنونة اللي عملها معاه .. ازاى حتى الوجع بيبقي موجود ....كلنا بنلف و ندور حوالين الوجع...

الإدراك مش مرحلة اكتشاف العيوب ..بالعكس ..هى مرحلة إدراك المسؤلية ..مرحلة إدراك إن بقى فى حد فعلا و انا عاوز اكمل معاه ..المرحلة دى بتبقى من أغبى مراحل ال (هيبتا) لسبب ...إن القرار بييجى من غير دراسة .. بيبقى قرار احتياج ..أنا عاوز أكمل و خلاص .. القلب بيتكفل إنه يدارى العيوب كلها عن العقل .. و يخلية بس يحس بمسؤلية ان لازم يوصل لأخر العلاقة .. الجواز ..أو اى نهايه بيسعى اليها ...

من الاخر كده ..كل القرارات بتتاخد فى المرحلة دى فى مجتمعنا ,, بيبقى الحب بس سبب كافى لتكافؤ العلاقة ..كل واحد بيلتزم بوعود هو مش قدها .. بيشوف الدنيا ربيع و انه قادر يعمل كل حاجة .... فمرحلة الإدراك هى أسوأ مرحلة فعلا , لأن عادة الندم بيحصل بعديها برمحلتين .. جزء كبير أوى من القرارات دى بيبقى فيه هرمونات و طاقة و غشومية زى ما بيقولوا ...

5- المرحلة الخامسة الحقيقة :

لا توجد حقيقة مطلقة .. مجرد أكاذيب عشقوا تصديقها ...

هنا العيوب بتبتدى تظهر ... و فيها بتظهر السبع احاسيس الى ممكن يتسببوا فى انهاء العلاقة اذا ما عرفناش نتعامل معاهم كويس .

الواحد بيغلط غلطة دايما فى بداية المرحلة الخامسه .. بيوعد وعود كتير قوى , هو مش عارف عمقها و لا اخرها ..بداية المرحلة الخامسة هى بداية ظهور ضعف كل واحد فى العلاقة ..عقده النفسية, لأن الحلو خلاص اتعرف فى المراحل الاربعه . و احنا كلنا بنى البشر فينا الوحش قوى و نقط ضعف كتير ..لازم تظهر .......

أولا: احساس الأمتلاك

و الامتلاك غير الغيرة ... إحساس السعادة الصافى الى بتبقى عايزه ليك لوحدك ..

مثال : انى اتجوز واحده او اخطبها : أمنعها من النزول, التليفون , اجبرها على ملابس معينة ..

قصة واحد من الحاضرين :

قالت لي عيب صغير فيها إنها "حرة" .. بتكره الراجل اللي بيحب يسيطر عليها او يأمرها من غير تفكير ... و طول مانا مش باعمل كده هي لوحدها هتبقي ملكي ..بس باختيارها .. بعد ما اتجوزنا ..منعتها من النزول طول مانا مسافر, منعتها من الكلام في التليفون .و لازم تحكيلي كل حاجه بالتفاصيل .. و بالتالي وصلنا لطريق مسدود ... مكملين لان ما بينا طفلة لكن مبقيناش اصلا متجوزين ..

مثال أخر : انه خايف انها تروح فى أى حته ..عايزها طول الوقت جنبه و كل ما تروح فأى مكان يبقى محسسها انها هتروح مترجعش أو هتسيبه ..

قصه:

(كان شخصا موجوعا دائما ..لا يثق فى أى شئ فى الدنيا على الاطلاق ... انها تشعر حقا بأنه ملكها , بل و تكتمل به ..لكنها تتألم من تلك النظرة القاتلة فى عينيه .. نظرة " سوف تتركينى" تراها و هو يتركها ليذهب لعمله .. تراها فى عينيه عندما تعود من عملها و يكون هو قد عاد قبلها ....

أقسمت له مرارا و تكرارا انها لن تجد فى الحياة من هو مثله ...

- انتى بتقولى كده بس عشان انتى فى الاول - مسيرك هتزهقى ...

كانت تفهم قصده .. لكنها فعلا ابتدت تتخنق .. اتخنقت من انها كل شوية لازم تثبت له قد ايه هى بتحبه ..اتخنقت من ان بعد كل اللى هى بتعمله ده هو لسه مقتنع انها هتسيبه و مش بتحبه او هتزهق بسرعه .. و عشان كان معودها على الصراحة و بيقولها .. فهى فعلا بدأت تصدق إن مفيش أمل .. و إنها عمرها ما هتعرف تسعده ..

تبدأ تظهر مشكلة عدم تقدير الطرف التانى...

ثانيا : احساس عدم التقدير:

مهما أعمل مفيش تقدير ... مهما أعمل دائما أشعر بالتقصير و الذنب و اللوم ... مهما أحاول مش قادرة اكفيك و اسعدك ...

هتلاقوا تشابه فى قصص كتير منكوا .... فى الاحساسين " الامتلاك و عدم التقدير"

ثالثا: احساس الاحتياج :

لما طرف يحتاج الطرف التاني اكتر ما يحتاج حبه ... أكتر حاجه بتهدد الحب أو بتقلله..لما الحب يتحول لإحتياج مطلق ..بس البشر عشان أضعف من إنهم يعترفوا بده ..بيسموه حب ....

انه دائما يحمِل عليها كل همومه و اوجاعه لدرجة انه ميقدرش يِغفرلها أى تهاون او تقصير من وجهة نظره حتى لو مش مقصود .... و يبتدى يحس أنه أظهر ضعف قدامها و هى مقدرتش احتياجه ..

القصه :

- مر بضغوط كتير قوى خلته محتاج حد معاه ..ماينفعش يبقى لوحده ..فحبها قوى ..و شاف فيها المستقبل المريح ......

حمِل عليها و هى حاولت ...

فى يوم مامتها عرفت و بدأت تشد عليها فى البيت ..مبقتش تعرف تبقى معاه وقت طويل .. و لم يستطع أن يغفرلها ..

و لما مبقاش حاسس انها بتديله الاهتمام الى هو شايف انه محتاجه ... بقا يعاملها وحش قوى ...لما شاف انها ماقدّرتش احتياجه , و فى نفس الوقت شاف نفسه ضعيف قوى لأنه بكى قدامها ..صورته اللى صورها لنفسه انه راجل و هيستحمل , اتهزت قدام نفسه فى عينيها و نظرتها ليه ....

لحد ما قرر يسيبها فى دقائق معدودة و يلقى كل اللوم عليها و لا يشعر تجاهها بأى شفقه ...

بس ايه رأيكم لو بصينا للدنيا من عين البنت :

الاحساس الرابع " الحِمل" و عبء المسئولية .

كان حلمها تدخل الجامعه و تلاقى حبيبها جنبها , و عندها أحلام و طموحات .. لقت نفسها مُحمله بمسؤليات و أعباء مكانتش مستوعباها

رابعا: احساس الحِمل :

- البنت البريئه فى اول ايام جوازها لما تكتشف ان حِمل البيت كله عليها , الشاب اللى كان فاكر انه هيقدر يتجوز و يكشتف حمل مصاريف البيت كله على كتافه ... الاطفال و مصاريفهم ....

الحِمل ده احساس تقيل قوى ..بينقَل فى الروح و بيتقَل فى الحب .. كل واحد بيبص للطرق الثانى على أنه مش فاهمه ..كل واحد مستنى من التانى انه يخفف الحِمل , مع إن كل واحد فيه الى مكفيه ..

خامسا: احساس الغيرة و الشك :

اتنين مش بيفترقوا ...توأم متماثل .. الغيرة و الشك ...

ايه الفرق بين الغيرة و الامتلاك :

-الغيرة اساسها عدم ثقة فى النفس ..الولد أو البنت بيبقوا خايفين إن الطرف الاخر لما يمر بتجارب تانية و يشوف ناس تانيه و يكلمهم و يتعامل معاهم ..ممكن يهجره أو يخونه بعد كده .. و عشان كده بتبقى خناقة لرب السما لما يحصل حاجه زى كده مع كل واحد ..

- أما الامتلاك : فهو إنك تطلب من حد إنك تبقى محور أهتمام حياته كلها .. إن ربنا فوق و انت تحت ...كل الكلام و التصرفات و الأسلوب و الضحك و الزعل و الحنية و حتى الغضب يبقول عشانك انت بس ...

مافيش واحد فينا الا و فيه مزيج من الاتنين.

سادسا : احساس عدم الرضا , الرغبه فى التغيير او التطبييع ..

كل واحد أو واحده بعد الجواز أو حتى فى خلال العلاقة أو الخطوبة .. بيحاولوا يخلوا الطرف التانى يفكر زيهم ...يتعود على طريقتهم فى الحياة ..يتعود على أسلوب تربيتهم و طريقة لبسهم و أكلهم ووو ,,, قليل اوى فينا الى بيرضي بالطرف التانى زى ماهو ...كل واحد بيحاول يطبع التانى بصفاته .. و المشكلة ان التانى لو قاوح يبقى هو مش فاهمنا أو مش عاوز يبقى معانا ... بل و أحيانا برضه الموضوع بيقلب بالحرب ...لو ما بقاش زينا يبقى مش هنكمل مع بعض ... أخطر و أسوأ المشاعر الى بتهدد أى علاقة دى ...لأن بطبعنا أنانيين ..و بنحب كل حاجة تمشى زى ما احنا عاوزين ..

سابعا احساس الملل :

كل واحد بيبقى داخل علاقة مهتم أوى للى جاي ...أول ما بيوصل لهدفه ..ويلاقى إن كل اللى كان مستنيه ..طلع عادى شوية ..أو طلع مش بالابهار اللى هو عاوزه ..بيمل و بيزهق .. و الملل احساس قاتل لو دخل جوه علاقة .. لما كل الكروت تتحرق بدرى ... و تتحرق بأسلوب غلط .. ساعتها ما بيبقاش فى جديد .. مهما عملتم حاجات كتير مختلفه عشان خلاص ..كل المشاعر اتعاشت و كل حاجه اتعرفت ..

القصه :

الولد امه اتوفت فبقى علاطول ساكت و مكتئب شهور طويله .. و محتاج البنت جنبه ..بس هو معاها دائما ساكت و مش عارف يتعايش معاها و مع مطالبها ..

البنت مش لاقيه الولد الى يلعب معاها و هو مش لاقى حد يفهمه ..فهى زهقت و هو زهق ... بس هو أتاثر قوى انها سابته ..لأنها الوحيدة اللى كان عارف يسكت قدامها ..

نقط الضعف او العيوب عادة بتبقي اخر حاجه تتوقعها من الشخص اللي قدامك ...

المرحلة الخامسة هي ظهور اسوأ مشاعر في كل علاقة ..

دول هم السبع مشاعر اللى ممكن يهدّوا أى علاقة مرت بينا ... فيه اللى بيواجهم كلهم ..و فيه اللى بيقابل شوية منهم بس مش بيستحمل .. مشاعر بتهد مش بتبنى ...

بس زى ما فيه سبع مشاعر بتهد , فيه خمس حلول .. بس اللى يعرف يعملهم صح ..يعدى المرحلة الخامسة بكل عيوبها ..

6- المرحلة السادسة القرار :

فى احساس الاحتياج و الحمل .. الى محتاج أكتر هو الى اختار ينفصل لأنه مش قادر يقَدّر و لا يتهاون مع اى تقصير من وجهة نظره ... هو حول الحب لإحتياج فقط .. حطهم الاتنين قصاد بعض فى الكفه ... لو قصرت فى احتياجاتى يبقى الحب مينفعش مش هتقدر تستحمل ..

احساس الرغبة فى التطبيع ..لو الطرف حس انه بيحب التانى اكتى ما هو محتاج يغيره .. لانه قدر يوصل الاحساس الى الطرف التانى محتاجه منغير ما يتغير و بالتالى مبقاش فى داعر للتغيير .

الحلول اللى بتقف قدام أى مشاكل فى الدنيا :

الاحترام ... الاحتواء ... الصراحة .. التضحيات .. الصفقه

انك تعرف تحترم مشاكل و عيوب اللى قدامك و ما تحاولش تغيرها .. ازاى تِعرف تحتويه منغير ما تحسسه بالذنب .. ازاى تعرف تصارحه و تكون صادق معاه فى مشاعرك السلبية و الايجابية ... و تعرف تضحى أو تتنازل عن إيه فيك , عشان تعرف تسعده و تلاقى حل فى العلاقة ..و إزاى تعمل صفقة .. قصاد كل حاجه تضحى بيها , هو يضحى بحاجة فى المقابل .. عشان تعرفوا توصلوا لنقطة تلاقى .. تعرفوا توصلوا لنقطه تفاهم ..

الكلام سهل قوى على الورق ..بس تنفيذه من أصعب ما يكون ..أنا عارف انكم دلوقتى حاسين انى عامل زى الشيخ اللى مهما اشتكيت له من مشاكلك, يقول لك لازم تصلى ... الحل تقليدى و ما فيهوش جديد .. بس هى المشكلة اللى فى زماننا دلوقتى إننا نسينا ما هو تقليدى ..الحلول دى هى الخلاصة .. بس محتاجة اتنين بيحبوا بعض قوى , عشان يعرفوا يتعبوا للوصول للحلول دى ..

ربنا خلق كل واحد فينا بعقده و مشاكله ووجعه و قرفه ... و خلقنا فى مجتمع مقرف أكتر .. ما حدش بيتكلم .. ماحدش بيحاول يفهم .. فبنوصل لنقطة الفراغ ..أو نقطة الرجوع , عشان نرجع لنفس الدايرة تانى من المشاكل من غير ما نحل .. اللى مش هيعرف يعمل الحاجات دى بيستسلم للواقع بتاعه ..و بيستسلم لنتايجه , اللى عادة بتبقى ملل و فتور و كدب و خيانه و طلاق ..

أحب أقول إن كل اللى جرب حاجه زى كده و ماعرفش .. يبقى هو لسه مش عارف يحب .. لو الطرف التانى مالتزمش أو ماحاولش أصلا .. يبقى الطرف التانى ما بيحبش ... الحب الحقيقى هو الحب اللى كل الناس بتتعب فيه قوى كل يوم و كل ثانية .. عشان يعرفوا يوصلوا لنقطة تلاقى تخلى الحياة " شبه" حلوة ..لأن ببساطة شديدة عمرها ما بتبقى حلوة .. بس بتبقى أحلى مع حد مقّدر وجودك فى الدنيا ..

7- المرحلة السابعة هيبتا :

المرحلة السابعة هى مرحلة النهاية ..إذا كان فعلا كل شئ هينتهى ولا هيكمل .. القرار ده من أصعب المراحل ..من أصعب الأدوات ..فيه ناس بتبقى جبانة جدا .. لدرجة إنها ممكن تكمل حياتها كلها فى علاقة جواز فاشلة عشان مش عارفة تقرر ... فيه ناس بتنفصل لأنها مش عارفة أصلا تحارب .. المرحلة السابعة هى خاتمة المراحل كلها ..

احنا بنضيع عمرنا في صراعات مقدرناش نصمد عشان نحلها ..

مش لازم نستنى لما الفرصة تضيع عشان نتحرك ...

___

بعض المقولات من الكتاب :

مافيش حاجة في دنيتنا اصلا "صح" .. كلنا عمالين نخبط فيها ..كلنا بنحاول نعيش علي قد ما نقدر .. ماحدش عارف و لا فاهم و لا متأكد من حاجة .. كلنا بلا استثناء غلط .. فلما الناس الغلط هي اللي تحدد الصح .. يبقي اصلا الصح ده ..غلط !

ربنا خلق الناس نوعين :

نوع بيعيش فيها و يموت فيها منغير ما يعرف اى حاجه عن اى حاجه ..جعلوه فأنجعل ... دول الى بنلاقيهم فى كل حته ما بيحبوش الجنان ...................... خرجوا من كلياتهم اشتغلوا و اتجوزوا و خلفوا ... دول اللى عاوزين الناس كلهم يبقول زيهم ... .... مشاكلهم تافهة و نظرتهم للدنيا علي قد عنيهم بس .. ضيقة اوي ...و فاكرين إنهم غير أى حد و اللى بيحصل لهم ده عمره ما حصل مع حد ...بيقلدوا كل حاجة و هم مش فاهمين أى حاجه ...

و النوع التانى:

هو اللى بيفهم كل حاجه .. فبيفضل تايه وسط البشر مش عارفين يفهموا غير الى حفظوه ................. هو اللى بيعرف يبص للدنيا من الخرم اللى من ورا .. فبيشوف كل حاجة على حقيقيتها ..

" الحضن" هو الشئ الوحيد الجسدى بين البشر , الذي يلمس روعة الروح ...

ذلك الدفئ ..

ذلك ال ...كل شئ !

أن تترك نفسك , و كل ما يؤلمك بين زراعى من تعشق .. أن تترك نفسك و كل ما يؤلمك له !

و توقف الزمن كله للحظات ..

و لو بسيطة.

#الحب #هيبتا