ليه كلنا عارفين شروط السعادة لكن مش عارفين ننفذها 10
- alyamohamed
- Sep 1, 2014
- 4 min read
فى ناس بتقول ليه نضايق نفسنا و نعقدها و نعد ندور على الى جوانا و نفكر كتير ...
عايزين ليستة ارشادات السعاده ..... ننفزها و خلاص ..
و فى ناس تانيه مش عارفه غير انها كل يوم تتكلم حوالين المشاكل ...
لكن برده من جواهم مش قادرين يدخلوا جوه نفسهم و يعرفوا ايه حقيقة مشاعرهم و معاناتهم ديه .. مش شايفين و لا فاهمين جواهم صح .. و جايز يلقوا لومهم كله على الاخرين ..
طبيعى ... هو احنا ازاى هنفهم الى جوانا لو مكوناش اتعلمنا نعمل كده او معندناش فرصة نعمل كده ؟...
طب إحنا ليه محتاجين نستجمع شجاعتنا و نكون صريحين مع نفسنا و ندور جوانا بجد على ايه الى مخلينا مش مرتاحين...
لأننا مهما قُولنا خطوات و اتفاقات و قرأنا ارشادات و سمعنا نصايح مش هنعرف ننفذها الا لو واجهنا الاول مشاكلنا الداخلية و فهمناها .
كلنا سمعنا و قرأنا نصايح كتير ... ارشادات السعاده .. ارشادات العلاقة الناجحه .. ارشادات معاملة الأبناء... حفظناها من كتر ما كل ما نشتكى بنسمعها ... لكن بالرغم من كده واقفين فى مكانا و مش بنتحرك و لا بنتحسن ..بالعكس ده احنا بعد شوية ممكن نفقد ايمانا بيها و نقول ده كلام كتب ...
عشان نقدر ننفذها او نخطى اى خطوه لقدام فى حياتنا لازم نعرف فى الاول و نفهم ايه الى واقف فى طريقنا .. مش سهل ... بس ممكن .. نقدر نعمله بنفسنا و ممكن نحتاج مساعده خارجيه...بس لازم نقدر .
برينى بتقول ((
" انا عندى الاف الرسائل و التجارب تؤكد ان الكلام عن الحجات الى جوانا و تعبانا و البحث فيها غير حياة ناس كتير ..."
" هو مكان جوانا عامل زى المستنقع! ... مش بقول ندخل و نمشي جواه و نعيش هناك - لأ ... ده مكان محتاجين جدا نزوره لكن مش محتاجين ابدا نعيش فيه .مش هينفع نبقى واقفين نتفرج و خايفين و مكابرين ندخل و نواجه نفسنا بجد و نتجاهل ده ... و مش هينفع برده ندخل و نعيش جوه ....
لازم نتعلم نعدى من المستنقع ده و احنا مثبتين رجلينا كويس و شايفين الشط قدامنا - الى نفسنا الى راضيه بينا و عارفه قيمتنا و استحقاقنا كويس مستينينا عليه "
الحياة بتاخدنا و تلعبكنا جواها و مبتخليناش عندنا فرصة ناخد هدنه و نفكر كويس ..
من كتر المشاكل و الضغوط الى حواليك .. سواء مع اهلك , فى البيت , مع العيال , مع الزوج , فى الشغل , مع الى الشخص الى انت مرتبط بيه...
الجو المحيط , الثورة ......
المجتمع ....
مشاكلك انت الشخصيه , حوادث حصلتلك فى حياتك, انا عايز ايه و عايش ليه , القلق من المستقبل ...
الاقى نفسي دخلت فى دوائر مغلقه و مش عرف اخرج ....
و مشاكل مش عارف بدأت فين و هتخلص ازاى ...
مش مرتاح ...
مش عارف ابقى كويس ازاى ....
بعمل حجات مش راضي عنها ... و مش عايزها ..
ابتدى احبط و اشعر ان انا المشكلة ..انا مستحقش .. العيب فيا ...
و ندخل فى دائرة الشعور بالخجل ....
انا لسه مقدرش احب نفس , انا مش ( حلوه, رفيعه, ناجحه, غنيه, زكيه, منتجه , لطيفه, قوية , مبدعه, حنينه .....) كفايه عشان استحق الحب ..!
انا ممكن اتغير عشان اتأقلم مع الى المفروض اعمله .
انا فاكره نفسي ايه عشان اورى الناس \ او اظهر ( افكارى, فنى , معتقداتى , كتاباتى .....) هى دى حاجه تستحق اوريها لحد!!
لازم اخد بالى منهم اهم بكتير من انى اخد بالى من نفسى.
انا مش قادر احافظ على حبى .
انا مستحقش الحب ده.
انا الى استحق كل ما انا فيه و مش لازم اظلم حد معايا .
انا عايز اخطط لمستقبلى , و شكلى و مظهرى يبقى كويس , عايز ارضى اهلى , عايز ارضي شغلى , عايز ارضي الانسان الى بحبه , عايز اجيب شقه حلوه, عايز اتجوز الشخص الى بحبه, عايز الاقيله وقت منغير مقصر فى البيت و الشغل ...
عايزه احارب عشان ابقى كل شئ لكل شخص !!!
))
لو متجوز :
ابنك عنده امتحان , و بنتك عيانه و مش هتروح المدرسه..
تخنت و اللبس مش جى على قدى....
المدير عايزنى اشتغل اكثر من اوقات العمل و بنتأخر فى الشغل و مش عارف اساعد مراتى...
الفلوس مش مكفيه المصاريف ...
لو مرتبط :
علاطول متعصب .. مبقاش يحبنى ..
علاطول مشغوله ..
اهلى بيضغطوا عليا عشان اتجوز ...
لازم احوش فلوس عشان اجيب شقه ...
حال البلد ميخليش اى حد عنده شجاعه يفتح بيت و يجيب اولاد ... المستقبل مظلم ...
لو لوحدك :
الوحده ..
هفضل كده لحد امتى ؟ العمر بيجرى .
ياترى هلاقى حب حقيقي و لا لأ و ازاى و فين و امتي؟
عايز احوش ..
احقق طموحاتى .. عشان اقدر اعيش حياه كريمه و افتح بيت .
احباط فى الشغل ..مديري بيعاملنى مش كويس ...
الدنيا زحمه ..مشاكل الجيران ... الثورة بتفشل ...
عارفين اننا لازم نعامل الناس الى بنحبهم احسن من كده ...
لازم نخطط لمستقبلنا كويس ... بس منخليش خطتنا تيجى على حياتنا ..
لازم نمشي مع نظام غذائي صحي و نحافظ علي نفسنا..
عارفين لاكن بنعمل العكس .....
تتعصب على البنى ادم الى بتحبه ...على العيال ..
مش قادر تسمع مشاكل .. تحرق سجائر ..
نتهم الى حوالينا انهم السبب فى عدم سعادتنا ...
بس مش شايفين كويس ايه المشكله الحقيقيه جوانا و لا ازاى نحلها ....
نفقد الأمل و نتقوقع و نهرب .... نتحاشى المواجهه, نمتلئ بالقلق و عدم الثقه فى النفس.........
من كتر اصلا مأصبح شعور "اننا منستحقش نبقى كويسين" موجود فى حياتنا .. مبقناش مدركين وجوده لكن بنتصرف على اساسه ..
لما بنوصل للمرحلة اننا نبتدى نشك اننا اصلا نستحق ...
يبدأ بقى شريط اياه يشتغل " انا مش جيده بشكل كافى " " العيب فيا " " انا المشكله"
الخجل ...
الخجل هو الاحساس الى بيخلينا حاسين بالصغر , ناقص , معيب , مش جيد كفايه ..
عشان نقدر نتجاوز الخجل ده ... لازم احدد انه موجود و اعرف هو موجود فين فيا بظبط ( ايه فيا مخلينى اشعر بكده ) , و اعرف حصل ليه ....
فى نفس الوقت احافظ على احساسى انى استحق الحب و الحياه الجيده , و اكون صادق و صريح و تكون معتقداتى, قيمى و افكارى و تصرفاتى متطابقين مع بعض.
from :
Book: The gifts of imperfection
Author: Brene Brown
Comentários