الحب و ممارسة الحب7

بريني قابلت جوزها ستيف سنة 1987 , كان عندها 21 و هو كان عنده 17 ... فى تدريب سباحة على حمام سباحة للجيران .... استمروا يرتبطوا و ينفصلوا لمدة 7 سنين لحد ما اتجوزوا سنة 1994 ...حاليا عندهم بنت وولد -- و كانت كاتبه على البلوج بتاعها فى 2008 بتقول مازال الحب بينهم زى ماهو ...

http://brenebrown.com/my-blog/page/205/

و قالت من سنة فى حوار... ان الزواج السعيد مش ان الاثنين يبقوا 50-50 -- لا ان يبقى فى واحد منهم 80 لما التانى يبقى 20 ---- و انها لايمكن كانت تقدر يبقى ليها المستقبل ده و لا العيلة ديه منغير ستيف ..http://kellyraeroberts.blogspot.com/2012/08/mamahood-business-dr-brene-brown.html/

برينى ابتدت رحلة تصحيح حياتها و رحلة الحياه من القلب سنة 2007 ... يعنى بعد 13 سنة جواز - و كان عندها 42 سنة -- عشان بس محدش يقول متأخر و لا بعد ايه ...

كتبت الكتاب الى بيتكلم عن الرحلة ديه سنة 2010 the gifts of imperfection ...

دى نبذه عن جواز برينى و ستيف ..

نرجع للكتاب و نكمل جزء الحب ....

برينى :

"اعترف ان ابحاثي عن المعنى الحقيقي للحب و الانتماء غير كثير من طريقة حياتى و معاملتى مع زوجى و اولادى.

من قبل , كنت عندما اكون فى حالة ارهاق و ضغط شديد ,الوم عليهم و اتصرف بسخافه و احيانا بقسوة , و خاصة مع زوجى ستيف .

اذا كنت بالفعل احب ستيف ( و انا حقا احبه ) ... من المهم جدا كيف اتصرف معه يوميا .. اهم بكثير ان اقول بحبك كل يوم .

عندما لا نتصرف بحب مع من نحبهم و يحبونا , هذا يستنزف الكثير منا .. لانه ضد ما نحمله داخلنا , و هذا يتسبب فى اجهادنا دون ان نشعر ."

"هذا دفعنى لأن افكر ما الفارق بين ان أدعى الحب (ادعى هنا انا معناها بقول إنى بحب "سواء ده حقيقي او لأ" ) و إنى امارس الحب ( يعنى أتصرف بحب) .!!

" فى محادثة لى فى الراديو المضيفه سألتنى : هل ممكن ان نحب أحد و نخونه او نعامله بشكل سئ؟"

جاوبت -

حسب دراستى لا أدعى أن أعلم هل يمكن ان تحب أحد و تعامله بقسوة او تخونه ... و لكنى متأكده انك عندما تفعل ذلك فأنت لا تعامله بحب و لا تمارس الحب معه .

و بالنسبة الىّ , انا لا احتاج لمن يقول لى احبك كل يوم , بل احتاج لمن يتصرف معى بحب كل يوم ."

اعتقد دى اكبر مشكله فى كل علاقاتنا ..... هل احنا فعلا بنتصرف مع الناس الى بنحبهم بحب ؟؟؟ .

كلنا احيانا بنكون بنحب لكن مش بييجى فى بالنا ان تصرفاتنا اليوميه لازم تعكس حبنا ده ..

احنا بنحب و بنسيبها بالبركه ... بنفتكر اننا كده خلاص الحمد لله لقينا الى نفسنا فيه و لازم بقى نرتاح و نبقى سعداء و خلاص منغير ما نبذل مجهود.

او نلاقى نفسنا فى مشاكل و و منبقاش فاهمين ايه سببها و نطلع منها ازاى .. كل واحد يرمى السبب على التانى فقط ... و تفضل المشاكل تدخلنا فمشاكل تانيه .. لمجرد اننا متصرفناش بحب ..

و ممكن نستمر كده بالدفع الذاتى منغير منستمتع بجد بحبنا ده ..

حتى الام و الاب ممكن ميكونوش واخدين بالهم انهم مش بيتعاملوا بحب مع ابناؤهم ..

يعنى لما ام تزعق لابنها لما يُقع ؟ او تعيط لابنها عشان ميسافرش يشتغل بره و يشوف مستقبله؟

لما الاب يحجب مشاعره عن اولاده و يوريهم الوش الجامد فقط ؟

او يطحن نفسه شغل ليل و نهار معتقدا هو كده بيوفرلهم حياه كريمه و قام بدوره .

او حتى لما يبقى عنده وقت الراحه يقضيه مع اصحابه ؟

لما الاب يتغرب عشرات السنين و يسيب اولاده و مراته ؟ هو بيعمل كده عشان بيحبهم ؟ طيب ماذا عن علاقتهم ببعض و حبهم المشاعر اللى هو و هما محتاجينها ؟ اللى اكييد بشكل أو بأخر بتأثر سلبا عليهم و على حياتهم !

لما الزوجه اول ما جوزها يرجع من الشغل قبل ماحتى يغير هدومه -- تقابله بلستة الطلبات و المشاكل ؟ او لما تتجاهله و تنشغل تماما باولادها ... كأن هو ماكينة الفلوس الى بيسحبوا منها و بس .

أو لو طرف منهم يقصر فى حق محبيه عشان شغله لتحقيق طموحات... فاكر ان ده لمصلحتهم او عشان يحس انه محقق ذاته...

او العكس ... الست او الراجل اى منهم ميقدرش تعب الاخر فى شغله و مستقبله اللى نجاح اى طرف منهم المفروض يكون نجاح للأخر , و يبقى عايزه فقط يتفرغ لطلباته ...

لو قعدنا نكتب هنملأ صفحات عن مشاكل يوميه فى جميع العلاقات الى لو فكرنا هنلاقى السبب الرئيس عدم التصرف بحب.

اكيد فى ظروف ساعات بتخرجنا عن ده عن غير ارادتنا و ساعات تبقى لقمة العيش اهم و ساعات نأجل.... بس كل حاجه ليها حدود , لازم تبذل ما فى وسعنا بضمير مش اتحجج او ارمى المسؤليه على الطرف التانى , خلينى صريح مع نفسى ...

الجرى ورا الطموحات و الماديات لا ينتهى و مش هيعوض عن المشاعر ..

الاتزان و التقدير مش سهل بس بيوصل للراحه و السعادة .. و لازم من الطرفين ...

حجات صغيره لكن مهمه و صعبه فى نفس الوقت .. طبيعى الكلام سهل

و كتير بنسهو عن الكلام ده .. او ظروفنا نفسيا او اجتماعيا متساعدناش نستوعبه .

بس فى كل الاحوال لازم نقرأ و نفهم و نفضل نحاول .... و نتشارك .

المطلوب بس , لما الاقى فى مشكله بينى و بين عيلتى, او الشخص الى بحبه, او اولادى ..

لازم ادور على السبب الحقيقي مش اطنش و مش ارمى المسؤليه على الاطراف الاخرى ولا امشي الحال و اريح دماغى. اكون صريح مع نفسي و مع الى قدامى. و اتحمل مسؤلية العلاقة .

الموضوع ممكن يكون مش سهل ، الي جوه الموضوع غير اللي بره .. و اللي بيدخل في دوامة الحياه و المسؤليات مبيبقاش قادر يخرج ..

المهم ان دي تبقي نية الطرفين، لو طرف واحد بس هتبقي المهمه شبه مستحيله ..

نقرب من الدين بتاعنا صح و احنا هنلاقي الحل لكل مشاكلنا ..

حتي لو هنستعين بمتخصص .. بس لازم منيأسش ...

جزء كبير مننا عنده خلل فى ثقافة التربيه و العلاقات و الجواز و اقامة الأسر ... مقصرين فى حياتنا الاجتماعية ..

اعتقد لازم نقرأ و نثقف نفسنا فيها زى بظبط ما بنعد نذاكر عشان ننجح و ناخد كورسات عشان نعلى فى اشغالنا ...

لازم كمان نقرأ عشان نحسن علاقتنا بالناس الى بنحبهم ..

الام و الاب لازم يقرءوا و يسألوا متخصصين فى تربية اولادهم

الست لازم تقرأ و تفهم ازاى تحب الراجل و تنجح العلاقه تخليها ديما متجدده و سعيده ..الراجل كمان لازم يقرأ و يفهم كويس ازاى يتعامل مع الست.

ليه قبل ما نبتدى اى حاجه بنحاول نتعلمها الاول و بنبذل مجهود عشان نفهمها -- الا الجواز و العلاقات و الانجاب -- عايزينه يمشى كده من نفسه .

و ليه برغم ان كلنا بنعانى ..لكن اقصي حاجه بنحاول نعملها اننا نشتكى و نتمنى الوضع يختلف و نرمى المسؤلية على الطرف الاخر .

زى كده ما الراجل , عنده استعداد يقرأ فى السياسه , فى الشغل و يتعلم و يدرس و يكافح عشان يجيب فلوس و بيلاقى وقت لاصحابه .. لازم كمان يتثقف و يقرأ يعنى ايه بيت و اسره و جواز و مسؤليه و ايه هو دوره فيه ( الى هو مش صرف فلوس و خلاص ) .. و ازاى يعامل مراته و اولاده و ازاى يحاول يقوم بدوره الحقيقى صح .

و ازاى يحافظ على علاقته بمراته و يحسنها و يخلى الحب دائما موجود .. عشان ده بشكل تلقائي هيعود على حياته و نفسيته.

و زى مالست عندها وقت للرغى و الشكوى و زى ما بتهتم بطموحتها و مستقبلها و الفيسبوك و عندها وقت للرغى و الشكوى. .. لازم كمان تتعلم يعنى ايه بيت و اسره - حمل و انجاب - يعنى ايه احافظ على نفسي و علاقتى بزوجى - ازاى أربى اولاد فى الزمن الى احنا فيه ده ...

ليه بنعتبر الحب هو النهايه السعيده و بنعتبر الجواز هو مقبرة الحب و مستسلمين لكده ! و كلنا نعد ننقل الخبرات السيئه للأخرين ...طيب انت ليه مش بتحاول تحل مشاكلك ....

انا عارفه ان حال البلد زفت و الجو محبط و حالة صعبه و الظروف مهببه و سوداء ... بس ده ميدعوش اننا نهتم و نحب بعض اكتر لان ملناش غير بعض !

لو فكرنا الموضوع ده قد ايه مهم بالنسبالنا و اساسى فى حياتنا -- اعتقد ان علاقاتنا بالى حوالينا و خاصة الحب و الأسرة بينعكس على حالتنا النفسيه و ممكن يوصلنا للمرض ..

و هو اكتر حاجه بنشتكى منها - و برغم كده - هو اقل حاجه بنحاول نبذل فيها مجهود عشان نتعلمها او نقرأ عنها او نبذل مجهود و نكافح عشان نحققها.

محدش يفتكر انى بقوله سيب شغلك و اعد للموضوع ده -- لأنك لو سيبته مش هتلاقى فلوس تشترى الكتب اصلا و لا هتقدر تعيش مع الى انت بتحبه حياه كريمه .... الاتنين مهمين ... منخليش جانب ياخدنا معاه و يإذي و يقصر الجانب التانى.

from:

Book: The gifts of imperfection

Author: Brene Brown

#الحب #المصاعب #تنميةذاتيه #مساعدةنفسية