خليك البنى ادم الى هتبقى سعيد لو عيشت معاه !!

سألت في يوم نفسي سؤال احنا عايشين ليه ؟ يعني ايه المطلوب مني في حياتي بمثل حياتي بماسورة دخلت فيها .. مدرسه ، مذاكره طحن، لازم اطلع من الاوائل اجازه لازم نستغلها فحاجة مفيدة .. . اعتكاف ثانويه عامة، حرب عشان اعلي مجموع .. لازم يبقي عندنا هدف - "الي هو كلية قمة" ..مفيش اختيارات اصلا . في دماغنا وقتها ساعتها ان الدكتور و الصيدلي و المهندس هما دول الي بيقدروا يحسنوا مستواهم المادي و الاجتماعى.. جه اختيار الكلية و القسم ... هو احنا نعرف ايه اصلا غير المدرسة عشان نختار .... نسمع كلمة من هنا علي كلمه من هنا ... يلا كلية قمة . سحل مذاكرة .. الاجازه كورسات ... عشان نستفيد .. اتخرجنا ....بحث عن وظيفة و عريس \ عروسة .. تكتشف انك متعرفش حاجة و لا عندك اي خبرة و لا تعرف حد ... تقضي اسوأ حياة تفليس و احباط و احساس انك ضيعت عمرك مذاكرة... لحد متيجي الوظيفة ... طحن شغل شغل شغل تعليم تحويش .. المستقبل ، الاهداف، الطموحات ..... يلا جه دور الجواز.. خطوبه - جواز - عيال - مصاريف - شكوى انا مين؟ فين؟ ليه؟ ..... و نبدا ندخل اولادنا في نفس الماسورة .....

لحد ما نموت !

في يوم فجأه لقيت كل حاجه انهارت ... الاحلام و الخطط و ترتيبات المستقبل ... الميزة في الموضوع ده انه خلاني سألت نفسي سؤال .... انا عايشه ليه و ايه الى انا عايزه اعمله؟ و بجد فى وقت كتير مكونتش فاهمه نفسي و لحد دلوقتى بحاول افهمها .....

فضلت متمسكه كتير باحلامي الي ضاعت و تخيلت اني منغيرها و لاحاجة ..

كل شوية بدخل فى حاجة و اسيبها - ادخل فى مود مختلف عن التانى..

انا مين بظبط ! بعد تفكير كتير و مراحل من التحرر من الاحلام ، علي احباط من ضياعها .. اكتئاب احيانا، نشوة تجارب جديدة احيانا اخرى...

لحد ما لقيت حجات مش بناخد بالنا منها و محتاجين نفكر نفسنا بيها .....

- احنا عايشين في الارض عشان نعبد ربنا ..نتبع دينا و دينا قال اتعلم , اشتغل ... لكن قالنا رزقك علي ربنا .

- مش عايشين عشان نحارب علي عربية جديدة، و لا شقة كبيرة ، و لا رصيد في البنك و لا مركز مرموق .... مش دي اولوياتنا.

- التخطيط زيادة عن اللازم لكل حاجة و توقع الحياه مثالية غلط .. لان في ثانية كله ممكن يتغير .. احط خطة و اتوكل علي ربنا... و لما تقف احط خطه بديله -- هى دى رحلة الحياة - مش هدف بنوصله و خلاص .

- بنحارب فى الدنيا عشان نحقق احلامنا - بس الحرب بتاخدنا لحجات لا تستحق - مع اننا اذا عارفين طريقنا و توكلنا على ربنا مش هيتحقق اقل من الى حاربنا عشانه .... رزقنا مكتوب عند ربنا و الحرب مش هتجيب اكتر منه.

- متعتمدش في حلمك علي حد .

- مينفعش اعيش كده و خلاص - لازم اسعى و وانت بتسعى تبقى واخد بالك الوقت استفدت منه ازاى , الفلوس صرفتها فى ايه , العلم الى بنتعلمه هنستفيد منه فى ايه .

- زى ما بغذي عقلى و بهتم بتطويره - كمان اغذي روحى و قلبى و جسمى و اهتم بمشاعرى و بتواصلى مع الناس .

- لازم تهدي و تريح نفسك.. مش انانيه .. بس اذا انت مش مرتاح هتدى الناس الى حواليك ازاى .

- مفيش حد عايز يعيش لوحده .. جايز يحتاج وقت يبقى مع نفسه - لكن لو حد فاكر انه هيلاقى السعادة لوحده يبقى غلطان - لان دى مش فطرة البنى ادم ... متخلقناش عشان كده ... بس فى نفس الوقت مش يروح لاى بنى ادمين عشان يملا فراغه و خلاص .

- لازم اقبل الناس زى ما هما مش لازم يبقوا نسخه منى او متفقين معايا فى كل حاجه عشان ارضي عنهم و احبهم . و قبلهم لازم اقبل نفسي.

- لما الاقى حد غلط , التمسله العذر و يا احاول اساعدة يا ادعيله , لكن عمرى ما اشاور و لا اصدر الاحكام عليه

- اتعلم تسامح .. بس سامح الأول نفسك , عشان مش هتقدر تسامح الاخرين لو مش قادر تسامح نفسك .

- عمرك ما هتقدر تاخد كل حاجه ..و لا تبقى كل الناس .

- الهروب من المشاكل مبيحلهاش بالعكس بيعقدها .

- مفيش مشكله بين اتنين بيكون سببها طرف واحد .. سهل جدا انك ترمى اللوم على الاخرين لكن الاصعب انك تتحمل مسؤليه دورك فى المشكله و تشارك فى حلها ..... اذا معملتش كده يا اما المشكله مش هتتحل , يا اما اذا اتحلت وانت مش طرف هتفقد احساسك بالانتصار انك شاركت فى حلها.!

- العصبيه بتدمر كل شئ - و تقدر تتحكم فيها هى مش سحر لا ارادى -- مش سهل بس ممكن .. بلاش تخسر الى حوليك عشان لحظات غضب و عند.

- عشان انا من النوع الى بفكر كتير , فبحتاج اعد مع نفسي شويه ارتب افكارى .. فإدى نفسك فرصه ترتب افكارك و تريح مخك من التفكير منغير متحس الذنب ..

قاعدة عجبتنى كل فترة كده لازم افكر نفسي بيها

خليك البنى ادم الى هتبقى سعيد لو عيشت معاه !!

محدش بيقدر يعمل كل ده مره واحده و مش سهل .. بس بنحاول نكتب الى بنفكر فيه و بنحاول نوصله ... زى مقولت قبل كده هى رحله .... اذا عايز اعيشها بختارها و ببذل مجهود فيها ....

اذا حد عايز يتقرب من ربنا ... لازم هيصلى و يتحمل مشقة الصوم و يحارب الشيطان و مره يغلط و يرجع يتوب .... هيبذل مجهود دائما عشان يتقرب من ربنا ...القرب من ربنا صح هو الحل الحقيقي ...