مش صح اسعى ابقى لوحدى 4

ايه هو مفهوم علاقة التواصل بين طرفين ؟

هى طاقة بين اتنين لما يكونوا قاعدين مع بعض شايفين و سامعين و مقدرين بعض .. ولما الاتنين يأخدوا و يعطوا منغير حكم على بعض و لا تقييم لبعض .. لما يقدروا يحسوا بالقوة والامان من العلاقة ديه .

لما برينى طلبت من اختها يتقابلوا و حكتلها المشكلة الى حصلت معاها .

اختها بعد اسبوعين كلمتها و قالتلها انها فرحت جدا ان برينى كلمتها و حكتلها على مشكلتها لانها حسستها انها مش لوحدها الى ممكن تتحط فى الموقف ده او تتصرف كده .. كمان حست بثقت اختها فيها و انها قدرت تساعدها .

لما بنختار حد صح نحكيله على مشكلتنا , احنا كده مش بنتقل علية و نزعجة زى ما بنبقى فاكرين , لا بالعكس احنا بنقوى العلاقه بينا و بنديله اضافه زى ما هو بظبط بيدينا اضافة .

علاقتنا بالناس الى حوالينا الى يهمونا من اهم الحجات فى حياتنا ...

برينى كتبت " فى الحقيقه العلاقات بين الناس هى احتياج بيلوجى للانسان من ساعة ما يتولد عشان ينمى بيه قدرته الجسمانية و العاطفية و العقلية و الروحانية. "

الموضوع مش موضوع احساس بالوحده و الانعزال

"الدراسات اثبتت في علم البيولوجى و علم الاعصاب ان الانسان مرتبط ارتباط وثيق بالعلاقات بينه و بين الاخرين و ان علاقتنا بالاخرين بتشكل تكوينا و خبراتنا . "

"حتى اللقاءات العابره بتأثر فى مخنا .. بتحفز عواطف معينه داخلنا سواء ايجابيه او سلبيه .. و كل ما نكون مرتبطين عاطفيا بالشخص كل ما بيبقى التأثير المتبادل اقوى ."

باختصار , الاتصال بين الاطراف فى العلاقات بيأثر على اداء و تطوير المخ !

الموضوع طلع كبير ! بس لو فكرنا فيه شويه هنلاقيه منطقي ...

الجزء ده انا قرأته كذا مره ... خلاني راجعت تفكيرى فحجات كتير...

فى حجات بتبقى مقتنع بيها بس حاسس فى حاجة مش مظبوطة , حاسس انك مش ماشي مع المنطق و الفطره و تحس فى تساؤلات مش لاقيلها اجابه -- انا كنت كده لما كنت دائما بقول انا عايزة اعيش لوحدى و مش عايزه حد و لا عايزه اعتمد على حد و لا يكون ليا علاقة قوية باى حد .

لكن لما بتصحح افكارك , بتلاقيك مقتنع بيها و كمان بتلاقيها ماشيه مع المنطق و بتحس براحه و كل تساؤلاتك بتتجاوب .

من ساعت ما تتولد بتحتاج مامتك عشان تقدر تنموا و تكبر

و اصلا انت عشان تتولد لازم قبلها بيكون فى علاقة بين زوجين .

الكون كله موجود بالعلاقات سواء الزرع او الحيوانات او النباتات .

اذا احنا كلنا محتاجين بعض.

اعتقد لو اتعاملنا من المنطق ده مع كل الى حوالينا - هنبص لعلاقتنا بشكل مختلف !

نحترم احتياجنا و احتياج الاخرين

عشان كده احنا محتاجين للتواصل ده و عمرنا ما نكون مرتاحين و احنا منعزلين عن العالم و الناس ... لان ده احتياج فطرى عند البنى ادم ... تواصل حقيقى .. تشوف و تسمع و تقدر الى قدامك مش عن طريق شاشات التليفون و اللاب توب ..

دلوقتى بقينا نعتمد على الفيسبوك و الواتس اب فى علاقتنا بالناس ...بقينا نقعد قدام شاشة الموبايل او اللاب اكتر بكتير ما بنقابل الناس الى احنا مهتمين بيهم .

تدخل كافيه او مطعم او حتى فى البيت -- نلاقى الاب و الام كل واحد مبحلق عفى الاب توب او السمارت فون بتاعه و الاولاد ماسكين التاب او السمارت فون بتاعهم او بيلعبوا فيديو جيم ... طب انتوا اعدين مع بعض ليه ؟!

تبقى معزوم عند ناس و تلاقى نفسك اعد مع موبايلك و هما مع موبايلاتهم !

بالعكس الحجات ديه بتبعد بينا و بتضيع وقتنا اكتر ما بتقربنا ! بتوهمنا اننا متواصلين مع الناس لكن فى الحقيقه مش ده خالص الاتصال الحقيقي اللى احنا محتاجينه . احنا محتاجين نشوف و نسمع الانسان الى قدامنا عشان نقدر نتبادل الطاقه العاطفيه الى بينا .

كمان فى كده حالة منتشرة بتاعت " الاكتفاء الذاتى" , 'انا عايز اعيش لوحدى' ... 'انا مش محتاج حد' ... و بنقنع نفسنا اننا لما منحتاجش حد ده كده يبقى نجاح و انتصار ! ... مع انت لو بسيط جواك هتلاقيك مش مرتاح بشكل حقيقي ...

اه العلاقات مع الناس محتاجه مجهود عشان تنجح -- لكن ده مش معناه انك لما تعيش لوحدك هتبقى مرتاح و مكبر دماغك ..!

يمكن الواحد يكبر محاط ببيئه و ناس يساعدوه و يمكن واحد تانى يكون فى بيئة او يقابل ناس يتعبوه و يخلوه يتجه للوحده ... بس هى دى الحياة و مفيش حاجه مستمره للأبد . معركه -- يا تقرر تعيش فيها من قلبك فى حب و ساعتها محتاج تتعب و تشتغل عشان تحافظ على ده -- يا اما تختار تعيش و خلاص و زى ما تيجي و ساعتها هتتعب برده بس هتفقد لحظات حب و سعاده هما اصلا متعة الحياه كلها .

فى حاجه كمان يمكن نفتكرها كويسه و تضحيه و عطاء -- بس لو فكرت فيها شويه هتلاقى بييجى لحظات بينك و بين نفسك بتكون مجهد و ناقم و حاسس انك مستغَل !! ....

انك ديما تحب تساعد كل الناس و تقف جنب كل الناس لكن لما انت تحتاج مساعدة مترضاش تطلب من حد حاجه ! ... تقول لأ انا ادى لكن محبش اخد حاجه من حد.. زى ما نكون عايزين نقسم الدنيا لناس محتاجه مساعده و ناس بتقدم المساعده - مع ان احنا كلنا الناس دى ..

اذا احنا عندنا حواجز اننا نطلب المساعدة ! ... عمرنا ما نقدر نعطى من قلبنا باستمرار بصفى نفس كامل ... هى حاجه ممكن متحسهاش ... ممكن تبقى عايش فيها و مش حاسسها بس اكيد بييجى او هييجى عليك يوم و تحس انك مُنهك و مُستنزف و يمكن يبقى عندك احساس ان الناس بتِستغِلك !

فى وقت من الاوقات كنت شايله كل حاجه فوق راسي .. انا دائما الى اساعد عيلتى , انا دائما الى اساعد اصحابى , فى نفس الوقت مش عايزه اعتمد على حد... يمكن حاولت اعتمد و فشلت فقررت أمشى حالى , و اتعودت على كده ... كنت دائما منهكه و ساعات ناقِمه .... لكن اتعودت و الحياه ماشية ... و اقنعت نفسي انى ممكن محتاجش لأحد ..

كنت دائما سعيدة انى اساعد الاخرين., لكن عمرى ما احاول اتصل او اطلب من اى حد حاجه ...

برينى بتقول فى الكتاب " انت بتحاول تستمد احساس بقيمتك الذاتيه بانك ديما تبقى انت الى بتساعد و محدش بيساعدك " .

دائما كان عندى احساس بالمسؤليه انى انا الى اعمل كل حاجه -- و كل الدنيا حوليا كانت بتدفعنى لكده .. و حاولت فى فتره و فشلت و احبط ...!! و فعلا قررت فى وقت ان انا لازم اتعلم معتمدش على حد .. و قللت عطائي للناس عن الاول كتير بس مكونتش راضيه عن نفسي كده . ..ببقى عايزه اساعد حد و امنع نفسي !

لكن الموضوع ده اتغير كتير مع الاحداث -- لما حصلت مشكله و التانيه و كل حاجه اتغيرت ... و انا احتجت اتكلم مع حد و اقرب من الناس و اتحرر شويه من الاعباء الى حطاها على نفسي ....

قربت من اخواتى و بطلت موضوع انى احاول اظهر بشكل مثالى و ان كله صح و تمام .. بقيت بحكي نقط ضعفى زى نقط القوة .. و بقيت احاول اتصرف على طبيعتى ... حسيت بعبئ اتشال من عليا .

حاولت كمان اعتمد على الناس .. الموضوع مش سهل .. ساعات كنت بنجح و ساعات لأ ... يعنى بيكون فى احاسيس شويه جوايا غريبه : مثلا : ليه حد يتعب نفسه مش عايزه حد يتعب عشانى !.

او مثلا : معملها انا اكيد انا هعرف اعملها احسن ! .. او مثلا : اعتمد على حد ليه مانا اقدر اعملها و اشغل بال حد ليه! ... او مثلا : لا مش عايزه حد يشيلنى جميل ! -- - بص تحس ان فى حاجه كده عايزه تنط من جواك و تعمل هى!!

ده حتى فى الشغل و فى كل حاجه !

لحد دلوقتى لسه عندى شويه من الحجات ديه ....بس قلت كتير عن الاول

فكرت و قلت : ليه احرم حد من انه يحس ان هو كمان بيساعدنى و انى اقدر اعتمد عليه .. اكيد زى مانا بتبسط انى اساعده او بكون حابه اساعده هو كمان بيكون حابب يساعدنى.. ليه احرمه من كده و فى نفس الوقت احرم نفسي من انى احس ان فى حد جنبى... حطيت نفسي مكان الطرف التانى .. انا كنت هتضايق لو حبيت اساعد حد و هو رفض .. ممكن احس انه مش عايز منى حاجه او مش عايزنا نقرب ..مع انى لما بعمل كده مش ببقى ده قصدى خاااالص .

العلاقه بين طرفين لازم يبقى فيه هات و خد -- غلط افضل ادى و بس و غلط افضل اخد و بس ..

و كمان فى حاجه تانيه مهمه ..

مش ادى او اخد الى على مزاجى و اللى مش على مزاجى لا !.. العلاقه فى اساسها طرفين يتواصلوا و يحاول كل واحد يتفهم الاخر و يتقبله - طاقة بتدفق بين الناس.. بس التدفق ده المفروض يبقى فى الاتجاهين و دى مسؤليه كل الاطراف مش مسؤلية طرف واحد.

.

from :

Book: The gifts of imperfection

Author: Brene Brown

ِ