لما تعمل موقف حسيت انك غلط فيه خلى عندك الشجاعه و احكيه ..2
- alyamohamed
- Jul 27, 2014
- 5 min read
من الحجات الى تركت اثر فيا ان عمرى مكان يحصل معايا موقف اتضايق فيه من نفسي و احكية , كنت لازم احافظ على شكلى المثالى قدام عيلتى و اخواتى و اصحابى -- كنت بفضل ساكتة و شايلاه فى نفسي .... لحد ما بقوا جبل
المهم بعد ما قرأت كتير و فكرت كتييير لقيت ان لما نتصرف بشكل غير مناسب او نغلط فى موقف و نتضايق من نفسنا المفروض نحكي بصراحه لحد..
ده الحل الوحيد اللى يخصلنا من الاحساس بالخنقة و الخجل و ميخليهوش يكبر و يتضخم جوانا و يسيطر علينا و مره ورا التانية يبقى ده سلوكنا او نلاقى نفسنا اتحاصرنا بيه و فقدنا السيطره و فقدنا نفسنا و ندخل فى دوامات من الخوف و الخجل.....
الشعور بالخجل بيكره انه يتعرف ,و بيحب يفضل سر !! . ميقدرش يعيش لو اتحكي و شاركناه مع حد ..
مكونتش فاكره الموضوع كبير كده - بنفتكر موقف و هيعدى و خلاص .... بس منغير منحس هيأثر علينا و هينعكس على تصرفاتنا ...
اعدت مع نفسي لقيت نفسي فى حجات مكونتش واخده بالى منها ....
لما بنتصل بحد قريب مننا و بنثق فيه و عارفين انه هيحس بينا و يفهنا و نحكيله على موقف اتصرفنا فيها غلط .......
الاحساس ان عندك استعداد انك تخلى انسان انت بتهتم بيه يشوف اخطاءك و نقط ضعفك ... و عارف انه هيقبلك و مش هيحكم عليك و حبه ليك مش هيتأثر .... ده بيخليك تحس بالقرب من الانسان ده .و لما الطرف التانى بيحس انك اختارته هو و كلمته ووثقت فيه و حكتله عن حاجه جواك و كشفت نفسك و نقط ضعفك قدامه ..و احساسه هو بيك .. بيخليه يحس بقربه منك و العلاقة بينكم بتقرب و بتقوى ............
دى ممكن تبقي احلى حاجه فى الدنيا ...!!! نعمة من عند ربنا ...
كلنا عندنا نقط ضعف ...تخيل لو كلنا نعرف كده و نقبل بعض .... مدى جمال الشعور الانسانى ده . ..!
عدم اكتمالنا إدانا النعمة ديه .. نقوى علاقتنا الانسانية و اتصالنا مع الناس و احساسنا بيهم و احساسهم بينا. ..بالتأكيد الخجل و الخوف لايمكن يقدروا يصمدوا قدام احساس قوى زى ده بين الناس - انك تحكى و تكشف اللى جواك قدام حد يقبلك و يفهمك ..
بس مش اى حد تحكيله ..لأنك لو حكيت للحد الغلط الموضوع هيسوء اكتر ...
محتاجين نحكى لحد صح , حد يقدر يحتوينا فى حالة قوتنا و كمان حالة معانتنا او ضعفنا .... ندور على حد يقدر يحس بينا فى الوقت اللى زى ده ..
ساعات بيبقى فى ناس مفيش فى حياتها الحد ده ......
بس قبل اى حاجه محتاجين فى الأول نبص لنفسنا هل احنا بنحس بالاخرين و مش بنحكم عليهم و بنتقبل نقط ضعفهم و بنقبلهم زى ماهما ؟؟ طيب هل احنا مبنحكمش على نفسنا و بنحس بيها و بنتقبلها ؟ هل احنا فعلا عندنا الشجاعه نحكى لحد بنحبه على نقط ضعفنا و لا احنا عايزين ديما نظهر مثاليين و نحكم على الى حوالينا ؟!
كلنا محتاجين يبقى فيه فى حياتنا انسان يحس بينا و يفهمنا و يقبلنا ... علشان كده لازم احنا نبدأ بنفسنا الاول ......
عشان نصلح حاجه لازم نفهمها كويس ..
ايه الفرق بين الشعور بالذنب و الشعور بالخجل الى بنتكلم عنه ؟
الشعور بالذنب انك تقول : انا عملت شئ سئ
لكن الشعور بالخجل انك تفكر : انا سيئ
لما تشعر بالذنب فقط - ده بيديك دافع ايجابي انك تعتذر و تحاول تغير الحاجة الي مزعلاك من نفسك او زعلت الاخرين منك و تحاول تحسن نفسك .
لكن الشعور بالخجل مش كده ... الشعور بالخجل احساس مدمر, بتحس انك سيئ و لا تستحق حب و احترام الاخرين .. و غصب عنك بيخليك انسان تلوم و تغضب من الاخرين و تحكم عليهم .... ممكن يوصل للاكتئاب, او للقسوة و ممكن حالات زيادة او مزمنة منه توصل للادمان .
الموضوع ده بيحصل لكل الناس - حتى لو عارفينه و دارسينه هيحصلنا تانى و منبقاش واخدين بالناا ... بس لو احنا فاهمينه كويس بالتعود هنقدر نسيطر عليه على الاقل فى معظم المواقف .. او على الاقل هنقدر نفسر تصرفاتنا .
فى الكتاب انواع الاصدقاء الى مش هيساعدونا لو حكينالهم فى الوقت ده
بس مش معناها نتجنبهم .. كل واحد يقدر يحدد لنفسه هو محتاج مين بظبط ... بس كمان فكر فيهم كتير عشان تحاول انت تتجنب ردود الافعال دى فى نفسك لو حد جه يحكيلك حاجه .. على قد ما تقدر ....
اتمنى اكون انا صديقه او ام او اخت او حبيبه المناسبه ان حد يحكيلى و يشيل العبئ ده من على كتافه .. و يكون رد فعلى يساعده مش يزوده .
1- الصديق , اللى لما هيسمعك يحس بالخجل عشانك و يتخض و يبقى صعبان عليه انت قد ايه حسيت احساس بشع .. فانت يجيلك احساس انك محتاج تطبطب عليه بعد موصلته للحاله ديه .
-صديق مخلص و جميل بس مش هيساعد فى الوقت ده!
2- الصديق الى يحسسك بالشفقه ( انه اسف عشانك) اكتر ما بيحسسك انه حاسس بيك ( انا قلبى معاك, اوعارف الاحساس ده كويس ) ...اللى يبصلك بنظرة شفقه و يقولك صعبت عليا او ربنا معاك ....
- صديق زى ده محتاجله طبعا بس مش فى الوقت ده !
3- الصديق الى يحسسك انه محبط من تصرفك وانه ميتوقعش منك تصرف زى ده ....!!
- اكيد ده مش هينفع نهائيا فى الوقت ده !
4- الصديق اللى يقولك , ازاى سمحت لده يحصل !! فكرت ازاى وقتها ! اكيد فى حد تسبب فى كده .. انا لو شوفته هورييييه ...!!!
- شكرا بس مش وقته!
5- الصديق اللى مش مستوعب اصلا ... " لا لا , اكيد انت بتبالغ , مش معقول كل ده حصل , انت كويس جدا و كل الناس اكيد بتحبك و استمتعت بالمحاضرة " ............... !
6- الصديق اللى بعد ما تحكيله يقوله " هو انت كده شوفت حاجه .. مشوفتش انا بقا ايه الى حصلى ....................... " !!!
برينى (الكاتبة ) دُعيت انها تُلقى محاضرة لاولياء امور فى مدرسة, و كعادتها جهزت نفسها و راحت فى المعاد و كله تمام .
و هى فى انتظار المنظِمة تعرف الناس بيها و تدعوها للمنصة ..فوجئت بالمنظِمة بتقول لأولياء الامور انهم احتمال الموضوع الى هيتقالهم ميجعبهمش بس هما لازم يستحملوه عشان اولادهم !! و ان برينى هتديهم محاضرة تصلح طريقهم مع اولادهم ...!!.
برينى طبعا فكرت فى نفسها " ايه الى الست دى بتقوله !! " .. و ارتبكت و طلعت على المنصة ....عندها احساس فيه حاجه غريبة , اولياء الامور قاعدين مش مرتاحين و مبحلقين فيها !
فى حاجه مش مريحه !! و فى واحد راجل قاعد مربع ايده و عمال يكح بصوت عالى !! كأنه مش عاجبه الى بيحصل كله ... الجو مش مريح و هى ارتبكت جدا
و بدل ما تصحح المعلومه و تقول للناس انها مش جيا تصلح طريقهم ولا حاجه ,, لا بالعكس ..
اتكلمت و اعدت تعلى صوتها و تحاول ترضي الراجل الى قاعد مش مرتاح ده و تحاول تجذب انتباه الناس .. و قعدت تقولهم إحصائيات مُخيفه عن الطلبه و حسستهم انهم لو مسمعوهاش دلوقتى أولادهم ممكن يسقطوا او يروحوا للمخدرات ...... !
مع ان هى عارفه كويس ان لما يبقى واحد زى ده فى الجمهور الى قاعد المفروض تتجاهله تماما .
المهم
خلصت المحاضرة و خدت بعضها و جرى على العربية .
طبعا حاسه انها مخنوقه و مش راضيه عن رد فعلها و لا عن اللى حصل كله و لا عن المحاضرة الى قالتها...
و جالها كل الأفكار السلبيه عن نفسها , و وشها سخن و قلبها بيدق بسرعة !
استجمعت كل شجاعتها و قالت الحل الوحيد عشان تتخلص من احساس الخجل و عدم رضاها عن نفسها ده إنها تحكى لحد..و مش اى حد طبعا .
فكرت فى اختها الاصغر منها ..
و فعلا كلمتها و قابلتها و حكتلها ...
و اختها استوعبتها جدا و احتوتها .... و الموقف عدا و حست ان حد شاركها احساسها ..
بعدها بفتره
اختها قالتلها انا مبسوطه انك اتصلتى بيا ووثقتى فيا و حكتيلى ....
يعنى مش الى بيحكى بس اللى بيرتاح ....لا كمان اللى انت بتحكيله كمان بيحس بقيمته عندك ...
العلاقات بين الناس ممكن تبقى جميله ..لو احنا فعلا اتعاملنا معاها صح
التواصل و الاحساس بالغير و الشجاعه هما الطريق للحياة من كل قلبك ......
from :
Book: The gifts of imperfection
Author: Brene Brown
Comments