فى وقت لازم نقف وقفه مع نفسنا

في وقت لقيت نفسي وصلت لمرحلة محبتش نفسي فيها ..

عصبية و انطواء و حنق علي الحياه و الناس ، ساعات قسوة على نفسي و على الى حوليا , كارهه نفسي و الناس .

مقتنعة ان أفضل حل انى اعيش لوحدى بعيد عن كل حاجة , اعتمد على نفسي فقط و محتاجش لأى حد..

قررت انى محتاجه مساعدة ..

تابعت متخصصيين و قرأت فى كتب و مقالات المساعده الذاتيه ، و حاولت احسن في حياتي و انظمها . اعدت مع نفسي كتير عشان بس احاول افهم كويس .

اعترفت ان احساس الحب, الاهتمام و التواصل مع الناس من أهم احتياجات الانسان.

أكتر وقت بتحس فيه بارتياح و فرح حقيقي من جوه قلبك هو وقت المشاعر و الاهتمام !

احيانا لما بنعيش حياة كلها المدرسه او الشغل رقم واحد، الحضن و الكلمة الكويسة ده حاجات غريب , الاغانى ، لازم نستغل كل الوقت فى الشغل و المذاكرة، لازم يبقي لينا هدف نتعب عشانه و الهدف ده يا اما دراسة او شغل ....

فى ناس لما بتتعود على كده بيتكون حاجز بينها و بين اظهار مشاعرها, يمكن تكون مش عارفة ازاى تظهرها اصلا !

انا مقتنعة ان مفيش حد معندوش مشاعر و ان الواحد يقدر يتعلم ازاي يتعامل مع مشاعره و ازاي يظهر الدفئ و العاطفه ديه زي ما هو كمان محتاجها ...

بس الموضوع محتاج شوية مجهود ..مش سهل علي حد عاش اهم سنين عمره منغير ما يظهر مشاعره ييجي مره واحدة و يتعامل بيها بسهوله... بس الاهم يبقي فعلا الواحد فاهم و مقتنع هى فين المشكلة...

وانا بفكر لقيت ان اكتر مخلوقات دافئه و بتحرك المشاعر, هما الاطفال .. ادفي حضن تلاقيه من طفل .. اعتقد الطفل بيهذب المشاعر و بيخرج طاقة العطاء و العاطفة عند اي حد.

قرأت جملة و من ساعتها بحاول دائما اخليها في بالي " خليك ديما الانسان الي نفسك تعيش معاه ". لو كلنا اتعاملنا كده اكيد هتفرق كتير.

محدش يتخيل ان المفروض الحياه تبقي سهلة و حلوة و مليانه حب و تفاهم و كل حاجه محلوله من نفسها .. مفيش حاجه كده ...

الحياه صعبة خاصة في بلد و ظروف و مجتمع زي الي احنا عايشين فيه و كل يوم بتجيلنا رسايل سلبية من كل حته حوالينا ..

عشان كده ،عشان نعيش كويس و مصالحين نفسنا و الي حوالينا محتاجين نبذل مجهود دائما و منخليش الاحداث السلبية تغيرنا و شوسه شويه بنتعلم و بنتعود .. السعاده مش هدف اخير هنوصله و نرتاح لا ده اختيار و طريق بنمشي فيه ...

#وقفهمعنفسك